الصفحة الرئيسية > أشعار بصوت شعراء > جمال بخيت : قصيدة : مش باقي مني
جمال بخيت : قصيدة : مش باقي مني
الجمعة 13 تشرين الثاني (نوفمبر) 2009, بقلم
جمال بخيت
قصيدة مش باقي مني
قصيدة جديدة للشاعر الكبير جمال بخيت ... مش باقي مني
نشرت بجريدة الدستور في
25/01/2009
مش باقي مني غير شوية ضي ف عينيا
أنا هاديهوملك
وامشي بصبري ف الملكوت
يمكن ف نورهم تلمحي خطوة
تفرق معاكي
بين الحياة والموت
مش باقي مني غير شوية نبض ف عروقي
خُدي.. وعيشي..
وافتحي لي تابوت
أفرح بريحة ورد فرعوني
وربنا ف عوني
إذا دخلت الجنة ولاّ النار
هاشتاق إلي ضحكتك
وقعدتي ف الدار
والقهوة متحوجة
من طيبة العطار..
ف كل يوم الصبح
باشرب حليب قبطي
وف النهار والمسا
بامسك ستار الكعبة لو سبتي
واثبت إذا هربتي
أهديكي عمري وحسي وجوارحي
أهديكي جرحي
هو اللي باقي ف دنيتي لما خلص فرحي
مش باقي مني
غير شوية لحم ف كتافي
بلاش يتبعتروا ف البحر
بلاش يتحرقوا ف قطر الصعيد
ف العيد
بلاش لكلب الصيد.. تناوليهم
خدي اللي باقي من الأمل فيهم
وابني لي من عضمهم
في كل حارة مقام
وزوريني مرة وحيدة
لو كل ألفين عام
ألم الجراح يتلم
مش باقي مني غير شوية دم
متلوثين بالهم
مُرين وفيهم سم
كانوا زمان شربات
والنكتة سكرهم
شربتهم الخفافيش
في قلب أوكارهم
مش باقي مني غير شوية دم.. ماأقدرشي
أسقيكي.. مواجعهم
وبرضه ما أقدرشي
أرميكي..
وأبيعهم
يمكن ف مرة تعوزي تطلبيني شهيد
هاحتاج يوميها الدم
يمضي علي شهادتي
مش باقي مني
غير شوية قوة ف إرادتي
علي شوية شِعر من خطي
حاسبي عليهم وانتي بتخطي
وانتي ف صبح الدلال
بتعطري شطي..
مش باقي مني
غير شوية ضي ف عينيا
أنا مش عايزهم
لو كنت يوم هالمحك
وانتي بتوطي
في معركة مافيهاش
ولاطيارات ولاجيش
وانتي ف طابور العيش
بتبوسي إيد الزمن
ينولك لقمة
من حقك المشروع
مش باقي مني.. غير
شهقة ف نفس مقطوع..
بافتح لها سكة
ما بين رئة.. وضلوع..
ما بين غبار.. ودموع..
وأنا تحت حجر «المقطم»
ف الدويقة باموت
أنا.. والعطش.. والجوع..
يئن تحتي التراب
وانا صوتي مش مسموع..
ياحلمنا الموجوع..
من المرور ممنوع..
مستني لما يمر
موكب سلاطينك..
مش باقي مني
غير شوية رحمة من طينك..
علي شوية صبر من دينك..
مش باقي مني غير حبة غُنا تايهين
ف الضلمة مش لاقيين
حس الفواعلية..
ولا صوت مراكبي عَفي
فوق المعدية..
ولا صوت بناتي العذاري
في كل صبحية..
والغنوة.. أمنية
«ياما نفسي أقابل حبيبي..
وانا ع الزراعية»..
صوتك وصوتهم غاب..
وانا تحت حجر المقطم.. باموت لوحديّا..
الليلة راحت عيوني
تطل ع البستان..
وجناين الرمان..
رجعت لي توصف عناد الغل والدخان
وسحابة سودا تضلل
علي الغُنا الغلبان..
رجعت لي توصف هبوب الموت
علي الألوان..
رجعت لي توصف..
.. خيال الذل..
ف موائد الرحمن..
مش باقي مني غير شوية كُفر بشروقك
وأنا..
منبع الايمان..
مش باقي مني..
غير شوية ضي..
وعينيا
مش قادرة تلمحني..
في وحدتي محني..
خايف أموت م الخوف
والضعف يفضحني..
...
السجن عشش ف قلبي
وماشي ف شوارعك..
نفس اللي باعني وخدعني
بالرخيص بايعك..
هاشيل حمولي انا
ولا هاشيل حملك ؟!
ماعدت أملك شيء..
فيكي.. ولا فيّا
ولا قيراط ولا بيت..
ولا نسمة صافية تلاغي النيل بحرية..
مش باقي مني
غير شوية حب جارحّني
ولا باقي مني
غير شوية ضي ف عينيا
نشرت بجريدة الدستور المصرية
http://dostor.org/ar/index.php?option=com_content&task=view&id=13359&Itemid=37
عرض مباشر : مش باقي مني
مشاركة منتدى
1. جمال بخيت : قصيدة : مش باقي مني, 1 تشرين الثاني (نوفمبر) 2009, 17:03, بقلم صلاح شامى
الأستاذ جمال بخيت
على مسئوليتى
هذه القصيدة الدامية ، وهذا اللحن الباكى
بحق الله لو كان بيدى كنت جعلته
النشيد الوطنى المصرى
لعنة الله على كل الأغانى الوطنية التى ضحكوا علينا بها وجعلونا نترك كل مباهج الشباب ونتطوع فى الجيش
ونحارب فى 73ونحن فى مشارف العشرين من العمر وبعد خروجنا تركونا نعوى فى صحراء الخايج نهباً للشيوخ
ونعود فى توابيت من العراق والقائمة تطول .
1. جمال بخيت : قصيدة : مش باقي مني, 14 كانون الأول (ديسمبر) 2009, 16:06, بقلم اليمامة/الجزائر
جمال بخيث نقلتني الى عالمي الموجوع والتي تئنها الدول العربية برمتها مش في مصر بس حتى في الجزائر يئن المواطن تحت وطأة العوز والجوع ويشتكي القلة حتى من هم اصحاب الرواتب لان السوق وجنونه وتكالبه غلبوه .. وهو بيجري هربان منهم .. في كل مكان وفي كل زمان هناك كلب يعظ وثعابين بتلسع والرحمة تقل والظلم يعم والوجع يتسع
بوركت يا شاعري الرائع فقد بكيت معك وانا استمع لها بصوتك وبأدائك الذي يعبر اكثر من الكلمات فالفرق شاسع بين قراءتها وبين سماعها بصوتك المعبر .. فالشعرية تسكن الصوت والقلب والكلمات
اليمامة/الجزائر
2. جمال بخيت : قصيدة : مش باقي مني, 19 كانون الأول (ديسمبر) 2010, 00:42
اقسم بالله من اجمل القصائد
تحياتى ليك انتا شاعر عظيم
وربنا يكثر من امثالك لمصر
بجد وصفت حالنا كمصرين
تحياتى تحياتى تحياتى
عمرو عامر
3. جمال بخيت : قصيدة : مش باقي مني, 27 كانون الأول (ديسمبر) 2010, 22:01, بقلم احمد اليكس
بجدد ياريت يبقى النشيد الوطنى
بحبك يا بلدى
4. جمال بخيت : قصيدة : مش باقي مني, 24 كانون الثاني (يناير) 2012, 00:12, بقلم bebo
اري انها كلمات عميقه لمست كل قلوب المصريين و هذا شيء ليس جديدا علي رجل من رجال هذا العصر في مصر ممن نجحوا في ان يرسموا الصوره بالكلمات بل ابلغ من الصوره
وفقك الله يا جمال و انت جميل بارك الله لك و بارك فيك